Мӯъҷизаи рангҳои табиат

User Rating:  / 1

Дар Муассисаи давлатии Осорхонаи миллии Тоҷикистон аз фонди Осорхонаи таърихии маҷмаа ва бахши Академияи мусаввирони Тоҷикистон дар вилояти Суғд  бахшида ба “Соли 2018 - Соли рушди сайёҳӣ ва ҳунарҳои мардумӣ” намоиш таҳти унвони “Мӯъҷизаи рангҳои табиат” ифтитоҳ ёфт.  Чорабиниро директори Осорхонаи миллии Тоҷикистон Абдувалӣ Шарифзода ифтитоҳ намуд.

Дар чорабинӣ Сафири Фаронса дар Ҷумҳурии Тоҷикистон хонум Ясмин Гуедар, Раиси иттифоқи рассомони Тоҷикистон  Ҳомидова Н., Раиси академияи мусаввирони Тоҷикистон Рабиев О., Сардори раёсати рушди ҳунармандӣ ва фарҳангу фароғатии Вазорати фарҳанги Ҷумҳурии Тоҷикистон Ғуломзода Қурбоналӣ, рассомони халқии Тоҷикистон  Вафо Назаров,   Комилҷон Ёдгоров, рассомони ҷавон ва маъруфи  тоҷик ба монандӣ: Михтоҷов Д., Парвин Гулов.,  Акмал Миршакар, Саттор Раззоқов,  кормандони илмии МД “Маҷмааи фарҳангию таърихии “Қалъаи Хуҷанд”ва дигарон иштирок ва баромад намуданд.

Ҳамчунин намояндагони васоити ахбори оммаи ҷумҳурӣ Шабакаи аввали Тоҷикистон, ТВ Сафина, ТВ Симо, сомонаи Sugd news.tj иштирок доштанд.

Дар намоиш аз маъхази Осорхонаи таърихии маҷмаа  ва рассомони вилоят ба миқдори 50 адад офаридаҳои рассомони маъруф:  Лим А.П., Ершов, Хушвахтов Х.Д., Ҳабибуллоев З.Н., Кузмин Г., Смехов В., рассомони муосир  Ёдгоров К., Ҷӯраев Ғ., Абдураҳмонов В., Ҷаборов А., Эшонова Н ва дигарон ба намоиш гузошта шуданд.

Мавзӯъҳову мундариҷаи асарҳои рассомон ҳодисаҳои таърихӣ, рамзи ҳаёту табиати зебои нотакрори диёрро дар бар гирифтааст. Ин мусаввараҳо бинандаро боз ҳам шефтаи табиати зебои Тоҷикистон мегардонад. Маҳз ҳунари воло метавонад арзишҳои фарҳангӣ ва манзараҳои оламшумули моро ба ҷаҳониён муаррифӣ намояд. Ин ҳама назокат дар мусаввараҳои рассомон акс ёфтааст, ки таваҷҷӯҳи ҳар як бинандаро бармеангезад.