Тоҷикӣ Русӣ English
ТОҶИКӢ РУСӢ
Тоҷикӣ Русӣ English
/ 1
Соҳаи гулпарварӣ ва боғдорӣ яке аз бахшҳои муҳими кишоварзии Тоҷикистон ба ҳисоб рафта, дар рушди муҳити зист, зебоии шаҳрҳо ва баланд бардоштани фарҳанги экологӣ нақши муҳим дорад. Пешрафти ин соҳа ба фаъолияти мутахассисони соҳибтаҷриба ва шахсони меҳнатдӯст вобастагии калон дорад. Яке аз чунин шахсиятҳои варзида Қурбонзода Абдусалом Қурбон мебошад, ки тӯли зиёда аз чил сол дар соҳаи кишоварзӣ, боғдорӣ ва ободонии муҳити зист фаъолияти пурсамар намудааст.
Қурбонзода Абдусалом Қурбон соли 1963 дар ноҳияи Бобоҷон Ғафуров таваллуд шудааст. Пас аз хатми Совхоз-техникуми ба номи Владимир Ленин дар шаҳри Ленинобод (ҳоло Хуҷанд) соли 1985 ихтисоси агрономиро соҳиб гардидааст. Аз солҳои аввали фаъолияти меҳнатӣ ӯ ҳамчун мутахассиси ҷавон дар соҳаи кишоварзӣ ба кор оғоз намуда, дар рушду пешрафти хоҷагиҳои кишоварзӣ саҳми назаррас гузоштааст.
Фаъолияти меҳнатии ӯ аз моҳи марти соли 1985 оғоз гардида, дар вазифаҳои гуногун, аз ҷумла сардори бригада, коргари бригада ва агрономи хоҷагиҳои кишоварзии ноҳияи Бобоҷон Ғафуров идома ёфтааст. Дар ин давра ӯ бо истифода аз таҷрибаи илмӣ ва амалии худ ба рушди соҳаи боғдорӣ ва парвариши гулу растаниҳои ороишӣ диққати махсус додааст.
Аз соли 2015 то имрӯз Қурбонзода Абдусалом Қурбон ҳамчун муовини аввали омири кулли Муассисаи давлатии «Маҷмааи фарҳангию таърихии “Қалъаи Хуҷанд”» фаъолият дорад. Дар ин вазифа ӯ дар ободу зебо нигоҳ доштани муҳити фарҳангӣ, кабудизоркунӣ ва рушди фарҳанги гулпарварӣ саҳми арзанда мегузорад.
Гулпарварӣ бахши муҳими фарҳанги миллӣ ва экологӣ мебошад. Қурбонзода Абдусалом Қурбон дар тӯли фаъолияти худ ба масъалаҳои парвариши гулҳои мавсимӣ ва бисёрсола, нигоҳдорӣ ва рушди кабудизоркунӣ, беҳтар намудани муҳити экологӣ, истифодаи усулҳои агротехникии муосир, таваҷҷуҳи хосса зоҳир намудааст.
Маҳорати баланди касбӣ ва таҷрибаи чандинсолаи ӯ имконият додааст, ки дар муҳити фаъолияти худ фарҳанги муносибат бо табиат ва муҳити сабзро ташаккул диҳад. Маҳз меҳнати чунин мутахассисон боис мегардад, ки муҳити шаҳрҳо ва муассисаҳои фарҳангӣ зебову назаррабо гарданд. Имрӯз гулпарварӣ яке аз самтҳои муҳими рушди шаҳрсозӣ ва сайёҳӣ ба ҳисоб меравад. Ороиши муҳит бо гулу буттаҳои ороишӣ ба баланд гардидани сатҳи маърифати экологӣ ва ҳисси зебоипарастии ҷомеа мусоидат менамояд. Қурбонзода Абдусалом Қурбон дар ин самт низ саҳми арзанда гузошта, барои ободонии муҳити муассисаҳои фарҳангӣ ва таърихӣ фаъолияти назаррас дорад.
Таваҷҷуҳи ӯ ба гулпарварӣ нишон медиҳад, ки рушди муҳити сабз метавонад як ҷузъи муҳими ҳифзи мероси фарҳангӣ ва таърихӣ бошад. Зеро муҳити зебо ва кабудизоршуда ба ҷалби сайёҳон ва болоравии нуфузи муассисаҳои фарҳангӣ мусоидат менамояд.
Боғи фарҳангию фароғатии ба номи Камоли Хуҷандӣ аз мавзеъҳои зебо ва истироҳатию фароғатии шаҳр ба ҳисоб рафта, бо роҳбарии бевоситаи Қурбонзода Абдусалом ҳамасола дар фестивал-озмунҳои ҷумҳуриявии “Сайри гули лола”, “Боғи беҳтарин”, “Гулпарвари беҳтарин” ҷойҳои намоён: як маротиба ҷои аввал, чор маротиба ҷои дуюм ва се маротиба ҷои сеюмро сазовор гардида, ҳамчун боғи беҳтарини истироҳатӣ барои Хуҷандшаҳр эътироф гардидааст.
Меҳнати софдилона ва фаъолияти бисёрсолаи Қурбонзода Абдусалом Қурбон аз ҷониби Ҳукумати кишвар қадрдонӣ гардида, ӯ соли 2016 бо нишони «Аълочии фарҳанги Ҷумҳурии Тоҷикистон» сарфароз гардонида шудааст. Ин мукофот нишонаи эътирофи хизматҳои арзандаи ӯ дар рушди фарҳанг, ободонӣ ва фаъолияти ҷамъиятӣ мебошад.
Қурбонзода Абдусалом Қурбон аз ҷумлаи мутахассисони варзида ва меҳнатқарини соҳаи кишоварзӣ ва гулпарварии Тоҷикистон ба шумор меравад. Таҷрибаи зиёда аз 40-солаи фаъолияти ӯ намунаи меҳнати содиқона, ҳисси баланди масъулият ва муҳаббат ба табиат мебошад. Саҳми ӯ дар рушди гулпарварӣ, кабудизоркунӣ ва ободонии муҳити фарҳангӣ барои насли ҷавон ҳамчун мактаби таҷриба ва ибрат хизмат мекунад.
Фаъолияти чунин шахсиятҳо нишон медиҳад, ки меҳнати ҳалол, дониш ва муҳаббат ба касб метавонанд барои рушди ҷомеа ва ҳифзи муҳити зист нақши муҳим гузоранд.
Сайфиева Шарифа – мудири шӯъбаи
оммави фарҳангӣ ва робита бо ҷомеа