Дар даромадгоҳи Қалъаи таърихии Хуҷанд меҳмононро Омири кулли муассиса Иброҳим Иброҳимов самимона истиқбол намуда хайрамақдам гуфт. Зимни мулоқоти самимӣ таъкид гардид, ки қалъаи таърихӣ ҳамчун яке аз мавзеъҳои муҳими таърихию фарҳангии шаҳри бостонии Хуҷанд дар муаррифии таъриху тамаддун, ҳунарҳои мардумӣ ва фарҳанги ғании мардуми тоҷик ҷойгоҳи хосе дорад.

Сипас, роҳбаладони муассиса роҳнамоӣ намуда меҳмонон ва иштирокдорони форумро бо экспонатҳои ба толорҳои намоишии ҷойгиршудаи қалъаи таърихӣ , оид ба таърихи ташаккул ва рушди он, бозёфтҳои бостошиносӣ, маводҳои нодир, мероси моддӣ ва маънавии ниёгон маълумоти муфассал пешниҳод намуданд.

Баъдан меҳмонон аз ҳавлиҳои ҳунармандони мардумӣ боздид ба амал оварданд. Дар ин ҷо бо тарзи зиндагии суннатии гузаштагон, урфу одат, фарҳанги рӯзгордорӣ ва ҳунарҳои мардумии тоҷикон ошно гардиданд. Дар ҳавлии тоҷир бо тарзи зиндагии гузаштагон намунаҳои осори суннатӣ ва дигар ёдгориҳои фарҳангӣ ба меҳмонон муаррифӣ гардиданд. Зеро шиносоӣ бо таъриху фарҳанг, ҳамчун таҳкими эҳтироми якдигар, дӯстӣ ва ҳамдигарфаҳмӣ на танҳо як барномаи маърифатӣ, балки ифодагари эҳтиром ба мероси гаронбаҳои ниёгон ва саҳми фарҳанг дар таҳкими дӯстии миёни мардумон ба шумор меравад.

Дар фарҷоми боздид иштирокчиёни форум бо руҳияи баланди дӯстиву ҳамдигарфаҳмӣ дар саҳнаи қалъаи таърихӣ ҷамъ омада, барои ба ёдгор гузоштани ин лаҳзаҳои хотирмон акси дастаҷамъона гирифтанд. Ин лаҳзаи самимӣ ҳамчун хотираи неку фаромӯшнашванда аз боздиди онҳо ба ин макони таърихӣ дар хотири иштирокчиён боқӣ монд.

Ба роҳбарият ва кормандони муассиса барои меҳмоннавозии гарму самимӣ, таваҷҷуҳ ва саҳми арзанда дар баргузории ин боздиди фарҳангӣ арзи сипос намуда, таъкид карданд, ки чунин мулоқотҳо дар хотири иштирокчиён ҳамчун лаҳзаҳои неки дӯстиву ҳамдигарфаҳмӣ боқӣ хоҳад монд.